corona virus & world 99

دنیا بھر میں کرونا سے ہلاکتیں88 ہزار، متاثرین کی تعداد15 لاکھ سے تجاوز کر گئی

(جتن آن لائن مانیٹرنگ ڈیسک) دنیا بھر میں کورونا وائرس سے اب تک متاثرہ افراد کی تعداد 15 لاکھ سے تجاوز کرگئی ہے جب کہ 88550 افراد ہلاک ہوچکے ہیں۔کورونا وائرس نے دنیا بھر میں نہ صرف تباہی مچارکھی ہے بلکہ انتہائی تیزی کے ساتھ بڑھ رہا ہے، جان لیوا وائرس سے اب تک 88550 افراد ہلاک ہوچکے ہیں جب کہ متاثرہ افراد کی تعداد 1519571 تک پہنچ چکی ہے۔

کورونا وائرس کے باعث اب تک سب سے زیادہ اموات اٹلی میں ہوئی ہیں جہاں تعداد 17 ہزار 669ہو گئی ہے جب کہ اسپین میں 14 ہزار 792 افراد لقمہ اجل بن گئے ہیں۔میڈیارپورٹس کے مطابق کورونا وائرس نے سپر پاور امریکا کی چولیں ہلادی ہیں، امریکا میں مسلسل تیسرے روز ہلاکتوں میں ریکارڈ اضافہ دیکھا گیا اور 24 گھنٹوں کے دوران مزید 1973 افراد ہلاک ہوگئے ہیں جس کے بعد ہلاکتوں کی تعداد 14797 تک پہنچ گئی ہے۔ امریکا دنیا بھر میں کورونا وائرس سے سب سے زیادہ متاثر ہونے والا ملک ہے جہاں متاثرین کی کل تعداد 431838 ہے۔

دوسری جانب فرانس میں 10 ہزار 869 افراد وائرس کے ہاتھوں موت کی وادی میں جا چکے ہیں جب کہ برطانیہ میں بھی اموات 7 ہزار سے تجاوز کر چکی ہیں اور 60 ہزار سے زائد کیسز رپورٹ ہوئے ہیں۔کورونا وائرس سے متاثر برطانوی وزیراعظم بورس جانسن بدستور انتہائی نگہداشت یونٹ میں زیر علاج ہیں تاہم ان کی حالت اب مستحکم بتائی جا رہی ہے۔کورونا وائرس کے باعث ایران میں بھی اموات کی تعداد4 ہزار کے قریب پہنچ گئی ہے،

نیدرلینڈز میں کورونا سے 2 ہزار 248، جرمنی میں 2349 جب کہ بیلجیم میں 2040 ہلاکتیں ہوئی ہیں۔ ترکی میں بھی وائرس سے 812، سویڈن میں 687، پرتگال میں 380 اور برازیل میں 819 افراد جان کی بازی ہار چکے ہیں۔چین کے محکمہ صحت نے کہاہے کہ چینی مین لینڈ پر بدھ کے روز نوول کروناوائرس کے 63نئے مصدقہ مریضوں کی اطلاعات موصول ہوئی ہیں جن میں سے 61 درآمدی تھے۔قومی صحت کمیشن نے جمعرات کے روز بتا یا کہ 2 مقامی مریض صوبہ گوانگ ڈونگ میں سامنے آئے ہیں۔

بدھ کے روز صوبہ ہوبے میں 2ہلاکتوں کی اطلاعات موصول ہوئیں۔ ؎؎سعودی عرب کی وزارتِ صحت نے گذشتہ 24 گھنٹے میں کرونا وائرس کے327 نئے کیسوں کی تصدیق کی ہے۔ مملکت میں اب کل کیسوں کی تعداد 2932 ہوگئی ہے۔غیرملکی خبررسا ں ادارے کے مطابق وزارت صحتِ کے ترجمان نے کہاکہ اب تک کرونا وائرس کا شکار 631 افراد صحت یاب ہوچکے ہیں اور مہلک وبا سے 41 ہلاکتیں ہوئی ہیں۔

تْرکی کی وزارت صحت کی طرف سے کہاہے کہ 24 گھنٹوں کے دوران ملک میں کرونا کے مزید 4117 کیسز سامنے آئے ہیں جس کے بعد مجموعی کیسز کی تعداد 38ہزار 226 ہوگئی ہے جب کہ مزید 87 افراد کی ہلاکت کے بعد کرونا سے ترکی میں اب تک 812 افراد ہلاک ہوئے ہیں

Leave a Reply