خیبرپختونخوا، بینکوں سے 20 ارب کے غیر قانونی لین دین کاسکینڈل سامنے آگیا

Spread peace & love
  •  
  •  
  •  
  •  
  •  
  •  
  •  
  •  
  •  
  •  
  •  

اسلام آباد(کامرس رپورٹر) وفاقی تحقیقاتی ادارے (ایف آئی اے) کے کراچی میں موجود شعبہ تفتیش

اور انٹیلی جنس نے خیبرپختونخوا کے مالاکنڈ ڈویژن میں بینک اکاؤنٹس میں بغیر ٹیکس کی ادائیگی

کے غیر قانونی طریقے سے 20 ارب روپے منتقل کرنے اور نکالنے کے سکینڈل سے پردہ اٹھادیا۔

ٹیکس چوری کی رقم مالاکنڈ ڈویژن میں ہی بٹ خیلہ، بونیر اور سوات کے علاقوں میں دیگر بینک

اکاؤنٹس میں منتقل کی گئی جو سال 2014 تا 2018 تک خیبرپختونخوا کا ٹیکس سے مستثنیٰ علاقہ تھا۔

ٹیکس انٹیلی جنس ڈیپارٹمنٹ نے مذکورہ سکینڈل میں ملوث افرا د کیخلاف فرسٹ انفارمیشن رپورٹ

(ایف آئی آر) بھی درج کردی ہے۔محکمے کے باخبر ذرائع نے بتایا لین دین کے طریقہ کار سے ظاہر

ہوتا ہے ان اکاؤنٹس میں رقم بغیر کسی معاشی جواز کے رکھی گئی، جسے متعدد مرتبہ جمع کروایا

اور نقدی کی صورت میں نکالا گیا۔ابتدائی تحقیقات سے یہ بات ظاہر ہوتی ہے رقم 3 قسم کے معاملات

میں منتقل کی گئی جس میں 10 تا 15 افراد ملوث تھے، تاہم ذرائع نے ٹیکس چوری اورسکینڈل میں

ملوث افراد کے نام نہیں بتائے۔ ان افراد کیخلاف اب تک صرف یہ کارروائی کی گئی کہ ان کی

جائیدادیں اور بینک اکاؤ نٹس منسلک کردیے گئے، ایف آئی اے معاملے کی مزید تحقیقات کررہا ہے

لیکن ملزمان پہلے ہی ضمانت پر ہیں۔ ٹیکس ڈپارٹمنٹ اس نتیجے پر پہنچا رقم کی منتقلی کا مقصد

ٹیکس سے بچنے کیلئے دولت کو اِدھر سے اْدھر بھیجنا تھا، ان لوگوں کیخلاف ٹیکس چوری ثابت

ہوئی ہے اور اس ضمن میں تحقیقات اگلے مراحل میں ہیں۔کچھ کیسز میں ٹیکس چوروں نے تحقیقات

رکوادی تھیں جسے عدالت نے بحال کیا کہ منی لانڈرنگ اور دہشت گردی کی مالی معانت کے کیسز

میں استثنیٰ نہیں دیا جاسکتا ،حتیٰ کہ خیبرپختونخوا میں ضم ہونیوالے قبائلی علاقوں سابق فاٹا اور پاٹا

میں بھی نہیں۔بعدازاں جب عدالت نے حکم امتناع واپس لے لیا تو اب ٹیکس ڈپارٹمنٹ ان بقیہ افراد سے

آمدن کے ذرائع کی تفصیلات حاصل کرے گا تاہم یہ بات سامنے آئی کہ ان افراد نے ٹیکس ڈپارٹمنٹ

کے ساتھ تعاون نہیں کیا اور اس سے قبل بھیجے گئے متعدد نوٹسز پر معلومات فراہم نہیں کیں۔ذرائع کا

یہ بھی کہنا تھا انکم ٹیکس ڈپارٹمنٹ کے پاس بھی ان افراد کا کوئی ریکارڈ موجود نہیں جس کا مطلب

ہے منتقل کی جانیوالی رقم کو ظاہر ہی نہیں کیا گیا تھا۔ بینک سے نقدی کی صورت میں نکالی گئی رقم

کے استعمال کے بارے میں جاننے کے لیے بھی ایف آئی اے نے تحقیقات کا آغاز کردیا ہے اور اب

ایجنسی اس بات کا تعین کرے گی کہ آیا یہ رقم منی لانڈرنگ یا دہشت گردی کی مالی معاونت سے

حاصل کی گئی جس کے لیے ادارے نے سکینڈل میں مبینہ طور پر ملوث افراد سے رابطہ کرلیا ہے۔

دوسری جانب ڈائریکٹوریٹ آف انٹیلی جنس اینڈ انویسٹی گیشن نے ایک بیان کے ذریعے اس بات

کی تصدیق کی کہ غیر قانونی اور ٹیکس چوری کی رقم دور دراز اور ٹیکس سے مستثنٰیٰ علاقوں کے

بینک اکاؤنٹس میں جمع کروائی گئی تا کہ آمدنی کا ذریعہ اور مجرمان کی شناخت پوشیدہ رہے۔

  •  
  •  
  •  
  •  
  •  
  •  
  •  
  •  

Leave a Reply